“Pandemiya dönəmindən sonra masa başında çalışanların sayı kifayət qədər artdı. Passiv həyat tərzi o qədər yüksək oldu ki, nəinki skoliozun, onurğada digər deformasiyalar – kifoz, lordoz, qamət pozğunluqlarının da sayı artdı. Oturaq həyat tərzində aktiv fiziki yüklənməyə məruz qalmadığımız üçün onurğa ətrafındakı hər iki qrup – simmetrik və qeyri-simmetrik əzələ, yaxud bir qrup əzələ zəifləməyə başladı. Nəticədə sadaladığımız xəstəliklər meydana çıxdı. Əslində, bu xəstəliklər insanlarda kifayət qədər var idi, sadəcə, bəzilərində ya yenidən yarandı, ya da olanların dərəcəsi artdı. Pandemiya dönəmində daim oturaq şəraitdə onlayn dərslər keçirildi. O zaman birinci dərəcəli skolioz ikinci dərəcəliyə, ikinci dərəcəli idisə, üçüncü dərəcəliyə çevrildi”.

Bu sözləri Pravda.az-a açıqlamasında tanınmış fizioterapevt reabilitoloq Gülnar Əhmədli deyib.

“Hər bir pasiyentə deyirik ki, skolioz sağalmayan xəstəlik deyil. Buna baxmayaraq, 10 yaşında uşaqla 25 yaşındakı yetkin insanın sağalma müddəti arasında fərq olacaq. Əlbəttə ki, 10 yaşında uşaq daha tez sağalacaq, dərəcə daha tez düşəcək. Yetkin insanda isə əksinə. Vizual - görüntü problemi yetkin insanlarda da kifayət qədər həll olunur. Yaşından asılı olmayaraq, skolioz, kifoz, qamət pozğunluğu olan insanın müalicəsində birinci yerdə fizioterapiya və reabilitasiya dayanır. Bunun başqa müalicə metodu yoxdur. Əgər dərəcələr yüksəkdirsə, məsələn, skoliozun üçüncü dərəcəsidirsə, yaxud kifoz qırx beş dərəcədən yuxarıdırsa, bu zaman müalicə ilə yanaşı, karset istifadəsi də məsləhət görülür...”, - həkim bildirib.

G.Əhmədli oturaq iş şəraitində çalışanlarla yanaşı, uşaqlar arasında da skolioz xəstəliyinin artmasından danışıb: “Bir uşaqda hələ skolioz yaranmayıbsa, həmin uşağın üzgüçülüklə məşğul olması daha yaxşıdır. Əgər skolioz və ya kifoz yaranıbsa, bu zaman hər hansı idman növü ilə məşğul olmazdan öncə həkimə müraciət edilməli, mütləq xəstəlik sağalmalı, xəstə xəstəxana şəraitində müalicə olunmalıdır. Yalnız bundan sonra tövsiyəmiz hər hansı idman, rəqs, gimnastika, üzgüçülük ola bilər. Yəni skolioz problemi olan uşaq həkim təyinatı olmadan idmanla məşğul olmamalıdır. Sosial şəbəkələr, “Youtube” üzərindən hər hansı hərəkəti etmək qətiyyən doğru deyil. Məsələn, bir uşaqda skolioz onurğanın sağına tərəf yönəlirsə, digərində soluna tərəf yönəlir. Yaxud bir uşaqda skolioz onurğanın döş şöbəsindədirsə, digər uşaqda onurğanın bel şöbəsində ola bilər. Müştərək olması da mümkündür, bu zaman skolioza eyni anda döş və bel şöbəsində rast gəlinir. Sosial şəbəkə üzərindən edilən idmanlar hər kəsdə eyni nəticəni verəcək. Bu isə xəstəliyin dərəcələrinin artmasına gətirib çıxara bilər”.