Mərkəzi Bankın notlarının faiz dərəcələrində kəskin azalmalar qeydə alınıb. Ötən ilin avqustunda 8,29%-ə təklif edilən 28 günlük notlar üzrə son faiz dərəcəsi indi 6,6%-ə enib. Həmin müddətdə 84 günlük notlar 8,6%-dən 6,65%-ə, 168 günlük notlar üzrə son faiz dərəcəsi isə 8,71-dən 6,71-ə enib. 252 günlük notlar üzrə son faiz dərəcəsi isə 9,18%-dən 6,72%-dək azalıb. Göründüyü kimi, Mərkəzi Bankın bütün notlarında gəlirlik səviyyəsi aşağı düşüb.

Azreform.info xəbər verir ki, iqtisadçı deputat Vüqar Bayramovun sözlərinə görə, faizlərin azalmasının bir sıra səbəbləri var:

"Əvəlla, Mərkəzi Bankın yüksək faizli notları digər dövlət qiymətli kağızlarını, praktik olaraq, “sıxışdırırdı”. O, birbaşa digər dövlət qiymətli kağızlarında da faiz artımlarına getməyi stimullaşdırmışdı. Bu isə qiymətli kağızlar bazarında daha yüksək faizli borclanma demək idi.

İkincisi, Mərkəzi Bank uçot faiz dərəcəsini azaltdıqdan sonra notlarda faizlərin aşağı düşməsi gözlənilən idi. Praktik olaraq, hazırda uçot faiz dərəcəsinin ən çox və bəlkədə hələlik yeganə birbaşa təsir etdiyi istiqamət məhz notların faiz dərəcəsidir.

Üçüncüsü, yüksək faizli notlar ilə Mərkəzi Bank bankların passiv aktivlərinin bir hissəsini cəlb edə bildi və bununla da maliyyə qurumlarında əlavə resurslara tələb yaratdı. Nəhayət, digər dövlət qiymətli kağızlarına nisbətən və bəzən xeyili aşağı faizlərin ödəndiyi ekosistemdə Mərkəzi Bank bahalı notları uzun müddət sektorda saxlaya bilməyəcəyi bəlli idi. Bütün bunlar ilə yanaşı, Mərkəzi Bankın yüksək faizli notları nəinki banklar, hətta bir sıra digər qurumlar üçün əlavə gəlir imkanları yaratdı".

Millət vəkili deyir ki, digər mühüm və eləcə də, maraqlı məqamlardan biri də Mərkəzi Bankın uçot və notlar üzrə son faiz dərəcəsinin aşağı düşməsinə rəğmən banklarda depozit faizlərinin artmasıdır. "Mərkəzi Bankdakı azalma qərarları bank sektorunda əks istiqamətdə faiz dəyişiklikləri ilə müşahidə olunmaqdadır", - deyə V. Bayramov əlavə edib.

Könül
Azreform.info