Ukrayna ordusunun Rusiyanın Kursk vilayətinə gözlənilməz hücumu və bunun arxasında dayanan səbəblər. Əvvəlcədən onu qeyd edim ki, Ukraynaın Kursk əməliyyatı çoxgedişli və çox məqsədli çarpaz oyunlara xidmət edir. Buradan təkcə Ukrayna, onun tərəfdaşları deyil, həm də hücuma məruz qalan Rusiya da faydalanmağa çalışacaq.
Birincisi, son aylarda, xüsusən də ABŞ-kı seçkilər fonunda və HƏMAS lideri İsmayıl Haniyənin ölümündən sonra Yaxın şərqdə yaranmış vəziyyət Rusiya-Ukrayna müharibəsi beynəlxalq aləmin diqqətində arxa plana keçirib. Bu əməliyyatı həyata keçirməklə Kiyev beynəlxalq aləmin diqqətini yenidən Ukrayna məsələsinə cəlb etmək və gündəmdə saxlamağa xidmət edir.
ABŞ-kı seçkilərdə Respublikaçılaırn namizədi Donlad Trampın seçki kampaniyasında önə çıxması və onun Rusiya-Ukrayna müharibəsinə Demokratlardan fərqli yanaşması rəsmi Kiyevi ciddi narahat etməkdədir. Düzdür, ABŞ-da Tramp prezident seçilsə belə Ağ Evin Ukrayna ilə bağlı siyasətində ciddi dəyişiklik olmayacaq. Amma Demokratlardan fərqli siyasətin də yürüdülməsi də istisna deyil və bunu Tramp açıq şəkildə dilə gətirib.
Avropa ölkələrinin isə ABŞ olmadan Ukrayna məsələsində Rusiyanıın qarşısında tab gətirməsi çətin məsələdir. Odur ki, rəsmi Kiyev bu əməliyyatı keçirməklə diqqəti özünə cəlb etmək və prosesləri öz xeyirnə yönəltmək məqsədi daşıyır.
İkincisi, Rusiya ilə danışıqlaqda əlini möhkəmlətmək istəyir və bundan maksimum faydalanmağa çalışır.
Üçüncüsü, Rusiyanın imicinə növbəti zərbə vurmaq və bununla da rus ordusunun bir daha beynəlxalq aləmə nümayiş etdirməkdir. İstənilən vaxt kişik qüvvə ilə Rusiyanın təhlükəsizliyinə ciddi təhdid yaratmaq olar.
Dördüncüsü, Rusiya cəmiyyətində xof yaradıb, parçalamaq məqsədi güdülür. göstərmək ki, təhlükəsizliyinizə təminat yoxdur. İstənilən an təhlükə ilə üzləşə bilərsiniz. Ukraynanın davamlı PUA hücumu da buna xidmət edir.
Beşincisi, Rusiyaya qarşı qisas kimi dəyərləndirmək olar.
Altıncısı, Kiyev bundan istifadə edib Moskvaya təzyiqi daha da gücləndirmək, ən əsası da Qərbdən aldığı raketlərdən Rusiyanın dərinliyini vurmaq üçün icazə almaq məqsədi daşıyır.
Kursk əməliyyatında Moskvanın marağı
Kursk əməliyyatı Rusiyadakı qüvvələrin maraq dairəsində olması istisna deyil. Çünki Rusiyada son prezident seçkilərindən sonra daxildə, xüsusən də orduda və təhlükəsizlik orqanlarında ciddi təftiş getməkdədir. Artıq xeyli sayda yüksəkrütbəli ordu zabitləri həbs edilib. Bu da öz növbəsində orduda və xüsusi xidmət orqanlarında cəbhələşməyə səbəb olub. Ordudakı qüvvələr belə bir əməliyyata rəvac verməklə daxildəki təftişi dayandırıb vəziyyəti öz xeyirlərinə dəyişmək planı ola bilər. Əgər belə olmasaydı, ordu hücumun qarşısını alardı. Rus ordusunun və kəşfiyyatın əvvəlcədən belə bir hücumdan xəbəri olması qeyri-mümknüdür. Bunun sübutu kimi "Vətənin müdafiəçiləri ordusu" təşkilatının Rusiyanın 58-ci ordusunun keçmiş komandiri və hazırda həbsdə olan general-mayor İvan Popovun azad edilərək Kurskdakı döyüşlərə qatılması ilə bağlı ölkə prokurorluğuna müraciəti qeyd etmək olar.
Bunu həm də Rusiyada ordu daxilindəki "razborkalar"ın nəticəsi hesab etmək olar. Bu prosesdə ordudakı çeçen qruplaşmasının aktivliyinin, o cümlədən "vaqner"in yenidən reablitasiyasının şahidi oluruq. Bütün bunlar ordu daxilindəki qruplaşmaların savaşının nəticəsi hesab etmək olar.
Növbəti bir məqam isə Putinin bundan həm orduda növbəti təmizləməni həyata keçirmək planı da istisna deyil.
Kursk əməliyyatının növbəti bir səbəbi isə Rusiyanı İranın İsrailə gözlənilən hücumundan kənar tutmağa xidmət edir. HƏMAS liderinin Tehranda qətlindən sonra İran Rusiyayay təkcə hava hücumundan müdafiə sisteminin möhkəmləndirılməsi məqsədi ilə silah və hərib texnika ilə təmin etməklə yanaşı, İsrailə hücumunda onun yanında yer almasını açıq şəkildə istəyib. RF Təhlükəsizlik Şurasının katibi Sergey Şoyqunun avqustun 5-də Tehrana səfəri zamanı bu məsələlər müzakirə edilib. Kursk əməliyyatı da məhz Şoyqunun Tehrana səfərindən dərhal sonra başlayıb. Qərb və İsrail bu taktikaya əl atmaqla Rusiyanın diqqətini İrana dəstəkdən yayındırmaqla Tehranı hücumdan geri çəkilməyə sövq edirlər. Bununla həm də Rusiyanın İrana daha çox orta və uzaqmənzilli raketlərin verilməsinin qarşısını almağı hədəfləyir. Bu plan da öz bəhrəsini verməkdədir. Məhz İranın İsrailə əks hücumlaırnın gecikdirməsinin səbəblərindən də biri budur. Çünki İran meydanda təkdir və İsrailə hücumdan uğurla çıxması üçün yetərli gücə malik deyil.
Odur ki, Kursk əməliyyatından bütün tərəflər özləri üçün faydalanmağa çalışacaq. Amma bunun ən çox ziyan çəkəcəyi ölkə varsa, o da Ukrayna olacaq və bu da istisna deyil.
Birincisi ona görə ki, Ukrayna həmin ərazidə uzun müddət mövqe tutub qala bilməz və Kiyevin buna yetəri gücü yoxdur. İkincisi, Rusiya əks hücum həmləsi ilə Kurskla həmsərhəd Ukrayna ərazisinə daxili olub əlavə ərazilər zəbt edə bilər. Onsuz da Moskvanın Xarkovu zəbt etmək kimi bir planı ortadadır. Rusiya bundan öz təhlükəsizliyini təmin etmək üçün bufer bölgə yaratmaq adı altında Sumı və Xarkova genişmiqyaslı hücum edib nəzərdə tutulan planını reallaşdıra bilər. Kiyev də bundan çox narahatdır və bu narahatlılığı görməmək mümkün deyil.
Mürtəza
Azreform.info