Radioloq həkim Aydın Əliyev TƏBİB rəhbərliyinin xüsusi, qeyri-rəsmi göstərişi ilə dekabr ayının 12-dən etibarən özəl klinikalara icbari tibbi sığorta göndərişləri dayandırıldığını iddia edib.

Ölkə.Az xəbər verir ki, həkim özəl klinikalarda işləyən minlərlə tibb işçiləri icbari tibbi sığorta gəlirlərindən məhrum edildiyini yazıb.

Qeyd edilən iddialarla bağlı Azreform.info  İcbari Tibbi Sığorta üzrə Dövlət Agentliyinə sorğu ünvanlayıb.

Sorğumuza cavab olaraq bildirilib ki, icbari tibbi sığorta çərçivəsində göndəriş müvafiq dövlət və ya agentliklə müqaviləsi olan özəl tibb müəssisəsinə verilir:

“İcbari Tibbi Sığorta üzrə Dövlət Agentliyinin 30 noyabr 2023-cü il tarixli 34 nömrəli Qərarına əsasən “İcbari tibbi sığorta fondunun vəsaiti hesabına tibbi xidmətlərin göstərilməsi üçün göndəriş vərəqələrinin verilməsi Qaydası”nda dəyişiklik edilib. Əsas dəyişiklik vətəndaşların vaxt, maliyyə vəsaiti itirmədən öz yaşadığı inzibati ərazi daxilində və ya tibbi ərazi bölməsi (TƏB) ərazisində dövlət və ya özəl tibb müəssisəsində xidmətdən yararlanmasını təmin etməkdir.

TƏB TƏBİB-in tabeliyinə verilən dövlət tibb müəssisələrinin inzibati ərazi vahidləri üzrə qruplaşdırılmasıdır. Bir TƏB-ə bir neçə şəhər/rayon üzrə dövlət tibb müəssisəsi daxil edilib. 1 TƏB-ə aid nümunəni diqqətinizə çatdırırıq: Şəki-Zaqatala TƏB-inə Şəki, Balakən, Zaqatala, Qax, Oğuz və Qəbələ rayonları daxildir. Ümumilikdə 14 TƏB var.

Əvvəlki qaydaya görə, vətəndaşa öz ərazisində və ya TƏB-in daxilindəki dövlət tibb müəssisəsində xidmətin göstərilməsi mümkün olmadıqda digər TƏB-də yerləşən həmin xidməti göstərmək imkanına malik olan dövlət tibb müəssisəsinə göndərilirdi. Məsələn, Qaxda yaşayan şəxsə həmin ərazidə və ya Şəkidəki xəstəxanada xidmətin göstərilməsi mümkün olmadıqda digər TƏB-də yerləşən məsələn, Mingəçevirdə olan dövlət tibb müəssisəsinə göndərilirdi.

Yeni qaydaya görə isə şəxsə həmin ərazidə və ya TƏB-in daxilindəki dövlət tibb müəssisəsində xidmətin göstərilməsi mümkün olmadıqda həmin TƏB-in ərazisində yerləşən pasiyentin seçiminə əsasən, agentliklə müqaviləsi olan özəl tibb müəssisəsinə xidmətdən yararlanması üçün göndəriş verilir.

Yəni əvvəlki qaydadan əsas fərqi və üstünlük ondan ibarətdir ki, vətəndaşa xidməti TƏB daxilindəki dövlət xəstəxanasında göstərmək mümkün deyilsə, vətəndaşa seçim hüququ verilir. Belə ki, ya vətəndaş TƏB-dən kənarda yerləşən dövlət tibb müəssisəsini seçir, yaxud da özünün aid olduğu TƏB-in ərazisindəki müqaviləli özəl tibb müəssisəsini seçir. 

Bununla yanaşı, vətəndaş seçdiyi digər TƏB-dəki dövlət tibb müəssisəsində, məsələn, Mingəçevirdə tibbi xidmətdən yararlana bilmirsə, bu zaman müalicə həkimi tərəfindən həmin TƏB-in ərazisində yerləşən agentliklə müqaviləsi olan özəl tibb müəssisəsinə göndərilir. Yəni vətəndaş yenidən öz yaşadığı əraziyə qayıtmadan xidmətdən yararlanır”.

Billurə Yunus