Enerji içkilərindən istifadə orqanizmdə hormonal balansın pozulmasına gətirib çıxarır.

Medicina.az xəbər verir ki, bunu endokrinoloq Ancelina Kombarova deyib.

O, buna enerji içkilərinin tərkibindəki kofeinin səbəb olduğunu bildirib:
“Həddən artıq kofein testosteron istehsalını azaldır və estrogen sintezini artırır. Bundan əlavə, enerji içkilərinin müntəzəm istifadəsi asılılıq yaradır”.

Kombarova onu da qeyd edib ki, isti mövsümdə energetik içkilər içmək daha təhlükəlidir:

“Bu, başgicəllənmə, ürək döyüntüsünün artması, baş ağrıları, miqren, həddindən artıq təşviş, diqqətin azalması, yaddaşsızlıq, ürəkbulanma kimi simptomlara səbəb ola bilər.

Onların tərkibində çoxlu miqdarda şəkər var, bu da diabetli insanlar üçün xüsusilə təhlükəlidir. Şəkər sürətli karbohidrat olduğundan enerji içkilərinin həddindən artıq istehlakı piylənməyə səbəb ola bilər”.

Xatırladaq ki, çərşənbə axşamı Rusiyada Dövlət Duması energetik içkilərin uşaqlara satışını qadağan edən qanun layihəsini ikinci oxunuşda qəbul edib. Qonşu ölkədə bu içkini yalnız yetkin insanlar ala biləcəklər.