İnanıram ki, sabah ən yaxşı görüşlərimizdən birini keçirəcəyik.
"Report" xəbər verir ki, bunu "Zirə"nin baş məşqçisi Rəşad Sadıqov UEFA Konfrans Liqasının II təsnifat mərhələsinin "DAK 1904"lə cavab matçı öncəsi mətbuat konfransında deyib.
42 yaşlı mütəxəssis sabah çətin görüşə çıxacaqlarını bildirib:
"Sabah bizi olduqca vacib matç gözləyir. "DAK-1904" kollektivi ev oyunlarında çox güclü təsir bağışlayır. Hər ev görüşlərində onları böyük azarkeş kütləsi dəstəkləyir. İlk qarşılaşmada qələbə qazanmışıq və müəyyən üstünlüyümüz var. Rəqib komanda ilk dəqiqələrdən təzyiq göstərəcək və bu fərqi aradan qaldırmağa çalışacaq. Biz də öz növbəmizdə çalışacağıq mərhələni adlayan tərəf olaq. İnanıram ki, sabah ən yaxşı görüşlərimizdən birini keçirəcəyik".
Qeyd edək ki, sabah Slovakiyada baş tutacaq "DAK-1904" və "Zirə" komandaları arasındakı cavab görüşü Bakı vaxtı ilə saat 22:30-da start götürəcək. Bakıda keçirilən ilk matç "qartallar"ın 4:0 hesablı qələbəsi ilə yekunlaşıb.
