Çin Tehrana diplomatik təzyiq göstərir, onu Hörmüz boğazında neft və mayeləşdirilmiş təbii qaz tankerlərinə hücumlardan çəkinməyə və dəniz təchizatına mane olmamağa çağırır.

Azreform.info xəbər verir ki, bu barədə "Bloomberg" yazır.

Bundan başqa, İran Qırmızı Aypara Cəmiyyəti ABŞ-İsrail hücumlarında ölənlərin sayının 787-yə çatdığını bildirir.

İranın dövlət televiziyasının məlumatına görə, İran Yaxın Şərqdəki ABŞ və İsrail hədəflərinə yeni raket zərbəsi endirib. Habelə bu səhər Qətərdəki ABŞ-nin Əl-Udeyd bazasına və İsraildəki müxtəlif hərbi hədəflərə hücum edib.

Bundan əlavə, İrandan Livana silah çatdırılmasında məsul olan Rza Xuzayinin İsrail dəniz qüvvələrinin Beyruta hücumu zamanı öldürüldüyü bildirilir.

"Əl-Ərəbiyyə"nin məlumatına görə, İsrail gecə ərzində İranda quru əməliyyatı həyata keçirib.

Əməliyyat Mossad və xüsusi təyinatlı qüvvələrin bölmələrini əhatə edir və daha böyük bir kampaniyanın bir hissəsidir.

"Bloomberg", İran Qırmızı Aypara Cəmiyyəti və "Əl-Ərəbiyyə" kimi mənbələrin yaydığı məlumatlar fonunda İsrailin İranda gecə saatlarında həyata keçirdiyi və Mossad ilə xüsusi təyinatlı bölmələrin iştirak etdiyi iddia olunan quru əməliyyatı münaqişənin yeni – daha riskli mərhələyə keçdiyini göstərir. Əgər bu əməliyyat daha geniş kampaniyanın tərkib hissəsidirsə, bu, Təl-Əvivin artıq yalnız hava zərbələri ilə kifayətlənməyərək İran ərazisində hədəfli, kəşfiyyat əsaslı və dərinlikdə diversiya xarakterli addımlara üstünlük verdiyini göstərə bilər. Belə ssenari isə Tehranın regional proksi qüvvələr vasitəsilə cavab imkanlarını artırmaqla yanaşı, birbaşa qarşıdurma ehtimalını da yüksəldir və nəticədə Yaxın Şərqdə müharibənin coğrafiyasının genişlənməsi riskini daha da aktuallaşdırır.

Miri
Azreform.info