Yuxu üzrə həkim-somnoloq, yuxu tibbi üzrə konsultant Elli Her gecənin ortasında oyanan insanların yenidən sürətlə yuxuya getməsinə kömək edə biləcək üsulları açıqlayıb.

Azreform.info xəbər verir ki, onun məsləhətlərini "HuffPost" yayımlayıb.

Ekspert bildirib ki, gecə saat 3-4 arası oyanan insanlar ən çox yenidən yata bilmədiklərindən və səhərə qədər yuxusuzluqla mübarizə apardıqlarından şikayət edirlər. Bu vəziyyəti aradan qaldırmaq üçün o, “koqnitiv yayındırma” adlanan texnikalardan istifadə etməyi tövsiyə edib. Onun sözlərinə görə, bu, beyni narahatedici fikirlərdən yayındıran hər cür tapşırıq ola bilər.

"Məsələn, 1000-dən yeddi çıxın. Və ya şam yeməyini necə bişirdiyinizi ən xırda detallarına qədər xatırlayın", - deyə mütəxəssis izah edib.

Somnoloq əlavə edib ki, əgər bu üsul kömək etmirsə, özü adətən başqa işlərlə məşğul olur: musiqi dinləyir və ya kitab oxuyur. Həkimin sözlərinə görə, boşuna yatmağa çalışmaq bədənin və beynin yatağı narahatlıq və məyusluqla əlaqələndirməsinə səbəb olur. Buna görə də onun fikrincə, yuxusuzluq zamanı yatmaq mümkün deyilsə, yataqdan qalxmaq və təxminən 30 dəqiqədən sonra yenidən yatmağa cəhd etmək daha doğrudur.

Həmidə İbrahimova